"Qırımlılarnı birden tenbilemek isteyim: yarın (dekabrniñ 27-nde - QA) Qara deñiz rayonında büyük talimler keçirilecek, çoq insan celp etilecek... çoq sayıda postlar olacaq ve rayon bütünley qapatılacaq", — dep bildirdi Aksönov Rusiye televideniyesine bergen intervyüsında.
Sentâbrniñ soñunda Qırımnıñ Rusiye yolbaşçısı Sergey Aksönov öz telegram kanalında yarımadada "territorial mudafaa bölükleriniñ büyük talimleri" keçirilgenini bildirdi.
Rusiye tarafından ilhaq etilgen Qırım yarımadasında Rusiye quvetçileri yollar, müim obyektler ve plâjlar yanında sıñır noqtaları, ateş noqtaları ve qamaçav noqtalarını qurdı. Silâlı quvetlerniñ ve teroboronlarnıñ talimleri "memuriy rayonlarnıñ blok etilmesi ve nezaret tedbirleri" ile bağlı edi. Aksönov qırımlılarnı "talimlerge yardım etmege ve tınçlıq saqlamağa" çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
