Qırımnıñ işğal yolbaşçısı Sergey Aksönov yarımadanıñ ğarbında RF ava ücüminden mudafaa sisteması pilotsız uçaqnı urıp tüşürgenini bildire.
"Qırımnıñ ğarbında ava ücüminden mudafaa sisteması duşmannıñ pilotsız uçağını urıp tüşürdi. Vaziyet nezaret astındadır. Sakin oluñız ve malümatnı tek işançlı menbalardan oquñız", - dep yazdı o.
Aksönov uçaqnıñ ne yerde urıp tüşürilgenini bildirmedi. Bu malümatnı mustaqil menbalardan teşkermek imkân yoq.
Qırımnıñ Canköy rayonında Mi-28 Rusiye arbiy helikopteri qazağa oğrağan, eki uçucı elâk olğan. Bunı mayısnıñ 12-nde Rusiye Mudafaa nazirligi haber etti.
Soñki aftalar Ukrayinanıñ qaşı ücümi ile bağlı daa çoq bildirmeler berile. Onıñ tarihı ve yeri aqqında iç bir şey belli degil. Bazıları Ukrayina ordusınıñ nişanı Donbas, bazıları ise işğal etilgen Qırım olacaq deyler.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
