Qırımnıñ Rusiye başı Sergey Aksönov, Qırımdaki müessiselerniñ COVID-19 sebebinden 1,58 milliard ruble tazminat aldı, dep iddia ete. Bunıñ aqqında o, Facebookta haber etti.
«2020-nci yılnıñ iyün-dekabr aylarında koronavirus yuqunçınıñ tarqalmasından eñ çoq zarar körgenler daa 607 iş adamı ve teşkilât 225,7 million ruble miqdarında ödeme aldı. Böyleliknen, bu yıl artıq 4,5 biñden ziyade hocalıq subyekti regional subsidiyalar üzre ödeme aldılar. Ödemelerniñ umumiy miqdarı 1,58 milliard ruble teşkil etti», – dep yazdı Aksönov.
Tünevin Qırımda 105 yañı koronavirus hastası qayd etildi, aynı zamanda 13-niñ hastalıq alâmetleri yoq edi. Bir künde 122, bütün vaqıt devamında ise 36 784 hasta tedaviylendi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
