Qırımnıñ Rusiye yolbaşçısı Sergey Aksönov Ukrayina Silâlı Quvetleriniñ olması mümkün qarşı ücümi ile bağlı yazını izaatladı. Memurnıñ sözlerine köre, yarımadada "vaziyetniñ er angi inkişafına" azırlar.
"Qırımnıñ mudafaasına azırlanuv ile bağlı bütün vazifeler çezile. Biz vaziyetniñ er angi inkişafına azırmız, quvet ve silâ yetrlidir", - dep yazdı o Telegram kanalında.
Soñki künlerde Ukrayinanıñ olması mümkün qarşı ücümi aqqında daa çoq bildirmeler yapıla. Onıñ tarihı ve yeri aqqında bir şey belli degil. Bazıları Donbas, bazıları Qırım olacaq deyler.
Evel Qırım.Aqiqat Rusiye ordusı Qırımnıñ şimalinde yañı istihkam qurmağa ve okop qazmağa devam ete dep bildirgen edi.
Qırımnıñ Rusiye yolbaşçısı Sergey Aksönov Ukrayina istihkam ve mudafaa sayesinde yarımadanı işğalden azat etemeycek, dep bildirdirgen edi.
Fevralniñ 24-nde Ukrayina prezidenti Volodımır Zelenskıy memleket Qırımnıñ işğalden qurtarıluvına azırlana, dep bildirgen edi.
Ukrayina prezidenti ofisiniñ yolbaşçı muavini İğor Jovkva Qırım.Aqiqatqa intervyü berip, Ukrayinanıñ er angi toprağınen bağlı uzlaşuvlar bir vaqıt Rusiyenen muzakere etilmeycek, dep aytqan edi. Onıñ qayd etkenine köre, kimse Qırım Kıyivniñ kontroli altına nasıl qaytarılır aytıp olamay, amma «qaytarılacaq». Onıñ aytqanına köre, «(Qırımnı qaytaruv) diplomatik yoluna arbiy vastalar» qoşula bile.
ABD devlet kâtibiniñ muavini Viktoriya Nuladn Amerika Birleşken Devletleri Ukrayinanıñ işğal etilgen Qırımdaki Rusiye arbiy obyektlerine darbe endirmesine qoltuta, dep bildirdi. Buña cevap olaraq Peskov Nulandnıñ Qırım darbeleri lafları «Washingtonnıñ halqara kerginlikniñ baş provokator rolüni qayd ete», dep bildirgen edi.
Bıltır dekabr ayınıñ soñunda Ukrayina arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirgen edi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirgen edi.
Avropada ABD ordusınıñ sabıq komandanı Ben Hoces Ukrayina Qırımnı 2023 senesi yaznıñ soñuna qadar azat etecek, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
