Kefe üzerinde ava mudafaası sisteması raketa urıp tüşürgen. Bunı Qırımnıñ işğal yolbaşçısı Sergey Aksönov bildirdi.
"Kefe üzerinde Ukrayina tarafından uçurtılğan raketa urıp tüşürilgen", - dep yazdı o.
Aprelniñ 8-nde saba saatlarında Kefede patlav sesleri eşitilgen edi. Qırımnıñ işğal yolbaşçısınıñ mesleatçısı Oleg Krüçkov bölgede ava mudafaası sisteması işlegenini bildirdi.
Krüçkovnıñ haber etkenine köre, urıp tüşürilgen raketanıñ parçaları Qırımnıñ meskün yerlerinden birine tüşken. Yaralılar ve dağıluvlar yoq eken.
Rusiye tarafdarı bloger Aleksandr Talipov Ukrayina ordusınıñ hızmetinde olğan "Grom 2" kompleksiniñ raketası aqqında yaza.
"Raketanıñ uçuş uzaqlığı 500 kilomet qadar ola bile. Bazası Odesa vilâyeti", - dedi o.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
