Qırımnıñ işğal yolbaşçısı Sergey Aksönov Rusiye Federatsiyası Federal Telükesizlik Hızmetiniñ yarımadanıñ Rusiye reberligine qarşı suiqast azırlağanı iddia etilgen Ukrayina ve Rusiye vatandaşlarınıñ yaqalanması ile bağlı bildirmesini izaatladı.
Rusiye memurı, şübeliler "Bağçasaray rayonında demiryol relslerini patlatqan gruppadır", dep bildirdi.
Aksönov Ukrayina mahsus hızmet organlarını suiqastnıñ sımarışçıları adlandırdı.
"Cinayetniñ sımarışçıları Kıyivde olğanına şübe yoq... Bizim hususiy hızmet organlarımız yahşı, ihtisasiy ve semereli işleyler. Ve biz mıtlaqa sımarışçılarnı tapıp olarnı cezalarmız", - dep yazdı Aksönov.
Kıyiv Rusiye quvetçileriniñ bildirmelerini izaatlamadı.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Bundan evel Rusiye Federal Telükesizlik Hızmetiniñ hadimleri Ukrayina ve Rusiyeniñ bir qaç vatandaşınıñ yarımadanıñ Rusiye reberligine qarşı suiqast azırlağanını bildirgen edi. Rusiye haber vastalarınıñ malümatına köre, Viktor Podvalnıy, Aleksandr Litvinenko, Sergey Krivoşein, Konstantin Yevmenenko, İgor Zorin ve Sergey Voynarovskiy yaqalanğan.
Olarnıñ Sergey Aksönov, Vladimir Konstantinov ve Yanina Pavlenkoğa suiqast azırlağanları iddia etile. FSB bu gruppanıñ Ukrayina Mudafaa nazirliginiñ Baş istihbarat idaresi tarafından teşkil etilgenini bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
