Qırımnıñ işğal yolbaşçısı Sergey Aksönov Aqyarda Kozaçya körfezindeki neft bazasında bugün saba yüz bergen yanğınnı izaatladı. Buña ait beyanatnı öz telegram kanalında yayınladı.
Onıñ sözlerine köre, Qırım üzerinde Ava mudafaası quvetleri bir pilotsız uçaqnı urıp tüşürgen, daa bir pilotsız uçaq Radio elektron küreş vastası ile yoq etilgen.
Yıqılmalar ve sakinler arasında qurbanlar yoq, dep bildirdi o.
Aprelniñ 29-na keçken gecesi Aqyarnıñ Kazaçya körfezinde neft bazası yanmağa başlağan. Bunı Qırım.Aqiqat mühbiri haber ete. Onıñ sözlerine köre, yanğın küçlüdir, tuman yalıñız saba saatlarında qısmen dağıla başlağan. Gece saat ekilerde şu rayonda atış sesleri de eşitilgen. Şeerniñ işğal yolbaşçısı Mihail Razvojayev yaqıt rezervuarları yanğanını bildirdi.
Qırımda olğan Rusiye senatorı Olga Kövitidi öz telegram kanalında Aqyardaki yanğın sebebinden Odesağa darbe endirilmesini talap etti.
Ukrayina akimiyeti yanğınnı izaat etmedi ve neft bazasında yüz bergen yanğın içün mesüliyetni üzerine almadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
