Rusiye kontrolindeki Qırımnıñ yañı sağlıq naziri Aleksandr Ostapenko oldı. Kreml kontrolindeki yarımada yolbaşçısı Sergey Aksenov imzalağan ferman Qırımnıñ Rusiye ükümeti saytında derc etildi.
«Ostapenko Aleksandr İvanoviçni Qırım Cumhuriyetiniñ devlet vazifesi – Qırım Cumhuriyeti yolbaşçısınıñ vekâletleri müddetine Qırım Cumhuriyetiniñ sağlıq naziri vazifesine tayin etmek», – dep aytıla buyruqta.
Bundan evel Ostapenko Semaşko Aqmescit hastahanesiniñ baş ekimi edi.
Sentâbrniñ 30-nda berilgen malümatqa köre, Qırımnıñ Rusiye yolbaşçısı Sergey Aksenov Rusiye kontrolindeki Qırım sağlıq naziri İgor Çemodanovnı işten boşatmağa qarar aldı.
Daa evel Qırımda ekimler koronavirus hastaları ile çalışqanları içün para alamağanını şikâyet etip, akimiyetke video vastasınen muracaat etti. Rusiye Tahqiqat komiteti ekimlerge para berilmegeni sebebinden teşkerüv başlattı.
Çemodanov, qırımlı ekimlerge koronavirus hastalarınen çalışqanları içün 59 mln rubleden çoq berildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
