Qırımnıñ Rusiye yolbaşçısı Sergey Aksenov yaz devamında «yerli akimiyet işini kontrol etmek içün» yarımada regionlarına kerçekleştirecek iş ziyaretlerini ilân etti.
«Maqsad qoydım, bütün yaz oğraşacam, yetişmesem, yılnıñ soñuna qadar yapacam, istisnasız er bir azbarğa burnumı tıqarım. Memuriyet yolbaşçılarını tenbileyim – risk almañız. Kimseniñ işini yapmaycam», – dep ayttı Aksenov iyünniñ 8-nde Qırım ükümetiniñ toplaşuvında.
Onıñ bildirgenine köre, «problem çezüvinden tamamen vazgeçken» akimiyetler bar. Aksenovnı yaşayış faaliyetiniñ qalımtılarını çıqaruv, ev yanlarını tamir etüv ve abadanlaştıruv meseleleri meraqlandıra.
Mayısta Aksenov Qırım regionlarına baracaq, dep aytqan edi.
Sergey Aksenov Ukraina milliy telükesizlik ve mudafaa şurasınıñ qararınen Ukraina sanktsion cedveline kirsetildi. Qırım Muhtar Cumhuriyeti ve Aqyar prokuraturasınıñ 2021 senesi fevral ayında bildirgenine köre, Ukraina uquq qoruyıcıları Aksenovğa şübheli olğanını haber etti. O, 2014 senesi Qırım Nazirler şurasınıñ reisi edi. Aksenov qanun ve cenk adetlerini bozğanından şübheli sayalar. Sergey Aksenov Ukraina reberligini Ğarpqa «taqlit etkeninde» qabaatladı.
