Qırımnıñ Rusiye yolbaşçısı Sergey Aksenov deñiz suvınıñ tatlılaştıruvını yarımadada suv resurslarınıñ qıtlığı meselesini al etecek «yekâne» yol dep saya. Onıñ aytqanına köre, yerastı suvlarını kötermek içün yañı quyularnıñ qazılması «belli aqibetlerge» ketirecek. Bu aqta o, oktâbrniñ 12-nde suv teminlevinen bağlı toplaşuvda ayttı.
«Yerastı suvlarınıñ bu miqdarda qullanıluvınıñ aqibetleri bar. Bizim fikirimizce, şimdiki yekâne yol – deñiz suvını tatlılaştırmaqtır… Memleketimizde ilk sefer böyle bir leyha kerçekleştirilecek. Yerastında suvımız çoq degen laflar – zenaatdaşlar, er şeyniñ erte ya da keç soñu bar. Kün kelir bu suvnıñ yerini deñiz suvı alacaq ve olacaq aqibetlerden köy hocalığımız qalmaz, bir şeyimiz qalmaz», – dedi Aksenov.
Daa evel Aksenov Qırımda suv teminlevi içün oktâbrniñ 12-nde yañı quyularnı qazıp başlaycaqlar, dep bildirdi.
Yarımada akimiyetiniñ malümatına köre, Qırımda Aqmescit ve bir sıra mesken yerini suvnen temin etmek içün ilk tatlılaştıruv tertibatını eki – eki buçuq yıldan soñ işlete bileler.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
