Link açıqlığı

Saatnıñ esas haberi

Aksenov, yılnıñ başından Qırımda 3 milliondan ziyade turist oldı, dep esabat berdi


Nümüneviy resim
Nümüneviy resim

Kreml kontrolindeki Qırım yolbaşçısı Sergey Aksenov bu sene yarımadada 3,3 million turist raatlandı, dep bildire. Bu aqta o, qomşu Rusiyeniñ baş naziri Dmitriy Medvedevge Qırım ziyareti vaqtında ayttı, dep yaza Rusiye kütleviy haber vastaları.

«Yazda esas kâr menbası kurort mevsimi ola, bugünge qadar Qırımda 3,3 million turist raatlandı, bu keçken sene raqamlarından 10% çoq ola», – dedi Aksenov.

Qırımnıñ Rusiye kurort ve turizm nazirligi iyünniñ başında yılnıñ başından yarımadanı 2 milliondan ziyade turist ziyaret etti, dep bildirgen edi.

Ukraina sıñırcıları Qırım ve Aqyardaki Rusiye FSBsiniñ sıñır idaresiniñ ilhaq etilgen Qırımnıñ memuriy sıñırında olğan «qalabalıq» laflarını inkâr etken edi. Ukraina Devlet sıñır hızmetiniñ malümatına köre, memuriy sıñırdan eki tarafqa da künde orta olaraq 4 biñ vatandaş ve 400 naqliyat vastası keçe.

Rusiye sıñır idaresi ise memuriy sıñırdaki keçiş noqtalarında «er kün tahminen 11 biñ insan ve 1,5 biñ qadar tehnika qayd etile», dep bildirgen edi.

Qırımnıñ Rusiye kurort nazirligi ilhaq etilgen yarımada 2018 senesi 6,8 mln turistni qabul etti, dep bildirgen edi. Bu raqam 2017 senesine köre üç qat ziyade oldı. Nazirlikniñ malümatına köre, millionğa yaqın insan Ukraina vatandaşı edi. Ukraina Devlet sıñır hızmeti Qırımnıñ memuriy sıñırından keçken yolcularnıñ sayısına esaslanıp, mezkür malümatnı red etken edi.

XS
SM
MD
LG