Rusiyeniñ Cenübiy okrugınıñ arbiy mahkemesi Qırımnıñ Rusiye reberlerine suiqast azırlağanında qabaatlanğan Konstantin Yevmenenko ve Aleksandr Litvinenkonı 10 ve 9 yılğa üküm etti. Bu aqta TASS Rusiye Federatsiyası FSBsiniñ matbuat hızmeti bergen malümatqa esaslanıp bildire.
Berilgen malümatqa köre, dava mabüsleri Ukrayına istihbaratınıñ menfaatları içün yarımadanıñ Rusiye akimiyet organlarınıñ reberlerine qarşı patlavlar azırlağan edi.
Olar nişanlarnıñ bulunğan yerini taqip etken, patlayıcı maddelerni taşığan, yollağan ve saqlağan eken.
Yevmenenko 10 yılğa azatlıqtan marum etildi, Litvinenko ise 9 yıl ve 6 ay sert rejimli koloniyada qalmasına üküm etildi. Mabüslerge 500 biñ ruble para cezaları da berildi.
Rusiye agentligi mabüslerniñ izaatlarını derc etmey.
Bıltır mayıs ayında FSB Qırımda Ukrayına Mudafaa nazirliginiñ Baş istihbarat idaresiniñ «casus ağını» yaqaladı, dep bildirgen edi. Laf yedi Ukrayına, Rusiye ve Bulğaristan vatandaşı aqqında ketti. Olarnı «rezonanslı diversion-terror ücümleri» ve Qırımnıñ Rusiye yolbaşçısı Sergey Aksenov, Qırımnıñ Rusiye parlamentiniñ spikeri Vladimir Konstantinov ve Yaltanıñ Rusiye memuriyet yolbaşçısı Yanina Pavlenkoğa suiqast azırlağanında qabaatladılar.
Ukrayına istihbaratı bu davanı «informatsion-psihologik mahsus operatsiya» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
