Qırımnıñ Rusiye yolbaşçısı Sergey Aksenov uçucısızlarnı Qırım içün «esas telüke» dep adlandırdı. Bu aqta o, TASS Rusiye devlet agentligine bergen intervyüsında ayttı.
«Qırım içün esas telüke – uçucısızlar, qalğanı kontrol altında buluna. Uçucısız cihazlar ise kiçik, küçlü akkumulâtorları bar, bazıda birer-birer, bazıda dalğanen kele. Şunıñ içün, ebet, nüansları bar – em de bizge qarşı bütün dünya memleketleriniñ istihbaratları çalışa, arbiy küçleri qullanıla», – dedi Aksenov.
Onıñ bildirgenine köre, Qırımda «zemaneviy» ava mudafaa sistemaları satın alına. Adlarını aytmadı.
Aksenov Qırımda uçucısızlarnı toplap başladılar, dep ayttı. Angilerini – aydınlatmadı.
Oktâbrniñ soñunda ABD milliy telükesizlik meseleleri şurasınıñ matbuat kâtibi John Kirby, İran arbiyleri Rusiye işğal etken Qırımda bulunıp, uçucısızlarnıñ Ukrayına vatandaş obyektleri ve infrastruktura obyektlerine darbe endirüvde «bivasta iştirak eteler», dep bildirdi.
The Jerusalem Post neşiri adı aytılmağan Ukrayına memurınıñ malümatına esaslanıp, Qırımda İran instruktorları yoq etildi, dep haber etti. Ukrayına Milliy telükesizlik ve mudafaa şurasınıñ kâtibi Oleksiy Danilov The Guardian neşirine intervyü berip, bu malümatnı tasdıqladı. Aksenov Qırımda öldürilgen İran instruktorları aqqında malümatnı «olmaycaq bir malümat» dep adlandırdı. Bu malümatnı cenk vaziyetinde mustaqil menbalardan temin etmek imkânsız ola.
Noyabrniñ 23-nde Ukrayına Silâlı quvetleriniñ Baş ştabı Aqyarda Rusiye ordusı Rusiye ve İran dronlarınıñ operatorlarını ögretmege devam ete, dep bildirdi.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayına uçucısızlarına» atış ve «ava mudafaa sistemalarınıñ işi» aqqında ayta.
Noyabrniñ 18-nde Qırımnıñ Rusiye yolbaşçısı Sergey Aksenov yarımadada onıñ kontroli altında fortifikatsion inşaatlar qurula, dep tasdıqladı.
Noyabrniñ 22-nde Rusiye kontrolindeki Qırım akimiyeti içtimaiy ağlarda yerli sakinlerniñ Ermeni Bazardan tahliye etilgenine dair «sahte haberler» tarqatıla, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
