Qırımnıñ Rusiye yolbaşçısı Sergey Aksenov uquq qoruyıcılarğa oña qarşı «suiqastqa» mania olğanları içün teşekkürler bildirip, şübheli tutuldı, dep ayttı.
«Eminim, bu cinayetni sımarış etkenler tapılıp cezasını alacaq. Kyiv tarafından terror telükesi tek Prezidentniñ mahsus arbiy operatsiyasınıñ maqsadlarına irişilip bütünley yoq etile bile. Böyle de olacaq», – dep yazdı o, Telegram kanalında.
İyülniñ 3-nde Rusiye FSBsi Qırımnıñ Rusiye yolbaşçısı Sergey Aksenovğa qarşı suiqast ıntıluvına mania oldı, dep bildirdi. Rusiye kütleviy haber vastaları mahsus hızmetlerniñ malümatına esaslanıp yazğanına köre, 1988 senesi doğma Rusiye vatandaşı tutuldı, «onı Ukrayına telükesizlik hızmetiniñ hadimleri celp etken ve adam Ukrayınada istihbarat-patlayıcı faaliyet, hususan – mayın-patlayıcı işini ögrengen eken».
Mayısnıñ 3-nde saba FSB bir qaç Ukrayına ve Rusiye vatandaşı yarımadanıñ Rusiye reberligine qarşı suiqast azırladı, dep bildirdi. Rusiye kütleviy haber vastalarınıñ malümatına köre, Viktor Podvalnıy, Aleksandr Litvinenko, Sergey Krivoşein, Konstantin Yevmenenko, İgor Zorin ve Sergey Voynarovskiy aqqında laf kete.
FSB, gruppanı Ukrayına Mudafaa nazirliginiñ Baş istihbarat idaresi qurdı, dep bildire.
Qırımnıñ Rusiye yolbaşçısı Sergey Aksenov şübheliler – bu yıl fevral ayında «Bağçasaray rayonında demiryollarnı patlatqan aynı gruppa» ola, dep bildirdi.
Qırım ve Aqyarda 2014 senesinden başlap eñ az 16 Ukrayına vatandaşı «casuslıqta» ve «diversiyalarda» qabaatlandı. 2015 senesi Rusiye rejissör Oleg Sentsovnı terakt azırlağanında qabaatlap, 20 yılğa üküm etti. Rusiye uquq qoruyıcıları «Hizb ut-Tahrir» islâm siyasiy teşkilâtınıñ vekillerini de «diversiyada» qabaatlay. Rusiyeniñ Ukrayınağa qarşı büyük istilâsı başlağan soñ yarımadada cenkke razı olmağanlar taqip etile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
