Rusiye FSBsi Qırımnıñ Rusiye yolbaşçısı Sergey Aksenovğa qarşı suiqast ıntıluvına mania oldı, dep bildirdi.
Rusiye kütleviy haber vastaları mahsus hızmetlerniñ malümatına esaslanıp yazğanına köre, 1988 senesi doğma Rusiye vatandaşı tutuldı, «onı Ukrayına telükesizlik hızmetiniñ hadimleri celp etken ve adam Ukrayınada istihbarat-patlayıcı faaliyet, hususan – mayın-patlayıcı işini ögrengen eken».
«2023 senesi iyün ayında çetel mahsus hızmetleriniñ casusı Qırım Cumhuriyetine kelip, cumhuriyet yolbaşçısınıñ maşinasını patlatuv yolunen keçirmege planlaştırğan terakt yapmağa azırlanıp başladı. Lâkin cinayetni soñunace yapamadı, çünki patlayıcını gizli yerinden çıqarğanda tutuldı», – dep bildirdi FSB.
Berilgen malümatqa köre, tutulğanğa qarşı Rusiye Federatsiyası Ceza kodeksiniñ 30-ıncı maddesiniñ 1-inci qısmı, 205-inci maddesiniñ 1-inci qısmına istinaden (terror ücümini yapuv ıntıluvı) ve Rusiye Federatsiyası Ceza kodeksiniñ 222.1 maddesiniñ 1-inci qısmına istinaden (patlayıcı maddelerni ve patlayıcı cihazlarnı qanunsız aluv, satuv, berüv) cinayet alâmetlerine köre cinaiy dava açıldı.
Mayısnıñ 3-nde saba FSB bir qaç Ukrayına ve Rusiye vatandaşı yarımadanıñ Rusiye reberligine qarşı suiqast azırladı, dep bildirdi. Rusiye kütleviy haber vastalarınıñ malümatına köre, Viktor Podvalnıy, Aleksandr Litvinenko, Sergey Krivoşein, Konstantin Yevmenenko, İgor Zorin ve Sergey Voynarovskiy aqqında laf kete.
FSB, gruppanı Ukrayına Mudafaa nazirliginiñ Baş istihbarat idaresi qurdı, dep bildire.
Qırımnıñ Rusiye yolbaşçısı Sergey Aksenov şübheliler – bu yıl fevral ayında «Bağçasaray rayonında demiryollarnı patlatqan aynı gruppa» ola, dep bildirdi.
Qırım ve Aqyarda 2014 senesinden başlap eñ az 16 Ukrayına vatandaşı «casuslıqta» ve «diversiyalarda» qabaatlandı. 2015 senesi Rusiye rejissör Oleg Sentsovnı terakt azırlağanında qabaatlap, 20 yılğa üküm etti. Rusiye uquq qoruyıcıları «Hizb ut-Tahrir» islâm siyasiy teşkilâtınıñ vekillerini de «diversiyada» qabaatlay. Rusiyeniñ Ukrayınağa qarşı büyük istilâsı başlağan soñ yarımadada cenkke razı olmağanlar taqip etile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
