Rusiye kontrolindeki Qırım yolbaşçısı Sergey Aksenov işğal etilgen Qırımnıñ Saq rayonında tüşürilgen uçucısız cihaz aqqında bildirdi. Bu aqta o, «Solovyev Live» telekanalında tarif etti.
«Bir qaç saat evelsi Saq rayonında uçucısız tüşürildi», – dedi Aksenov.
Telegram kanalında Aksenov tüşürilgen uçucısız Ukrayına Silâlı quvetlerine ait ola dep, al-azırda «vaziyet kontrol etile», dep qoştı.
Ukrayına arbiyleri bu haberni izaatlamağan edi. Cenk şaraitlerinde bu malümatnı tasdıqlağan mustaqil bir menba yoq.
Avgusttan başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
