Qırımnıñ Rusiye ükümetiniñ yolbaşçısı Sergey Aksenov bildirdi ki, Avropa Birligi memleketleri ve Amerika Birleşken Devletleri Rusiyeniñ Qırım işğalinden soñ kirsetken sanktsiyalar qırımlılarnıñ aqlarını boza, amma yarımada iqtisadiyatına tesir etmey.
Bunı Aksenov dekabrniñ 20-nde Facebookta Rusiye prezidenti Vladimir Putinniñ matbuat konferentsiyasını izaatlap yazdı.
«Bes-belli, qırımlılarğa qarşı sanktsiyalar esas insan aqlarını bozmaqta, bu közümiz ögünde Ğarpta peyda olğan yañı totalitarizm alâmetleridir. Amma Qırım iqtisadiyatınıñ inkişafına sanktsiyalar pek az tesir ete. Daa doğrusı, çetel biznes, şu cümleden Avropa, tarafından büyük meraq bar, yarımadada leyhalarnı yerine ketirmege isteyler», – dep qayd etti Aksenov.
Onıñ aytqanına köre, Qırımda 2400-den ziyade şirket qayd oldı, «olarnıñ tesisçileri 56 memleketten çetel teşkilâtlar ve şahıslar ola». Aksenov Qırımda ve Rusiyede halqara dep adlandırılğan Yalta iqtisadiyat forumı aqqında da hatırlattı.
Rusiye prezidenti Vladimir Putin cumaaqşamı künü Moskvada keçirilgen matbuat konferentsiyasında Qırım sakinleri 2014 senesinden soñ Ğarp memleketleri tarafından kirsetilgen sanktsiyalardan zarar köre, dep bildirdi.
Ukraina prezidenti Petro Poroşenko noyabrniñ 8-nde Avropa liderlerini Rusiyege qarşı sanktsiyalarnı uzatmağa çağırdı, çünki Moskva Minsk añlaşmalarına riayet etmey. Onıñ aytqanına köre, böylece «işğal altındaki ukrain topraqlarında, Rusiye ve işğal etilgen Qırımdaki apishanelerde qanunsız tutılğan» reinelerni azat etme esnası temin etilmey.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
