Rusiye kontrolindeki Qırım yolbaşçısı Sergey Aksenov yarımadanıñ üç esas problemini aydınlattı. Onıñ aytqanına köre, bular – qırımlılarnıñ yaramay keliri, paalı azıq malları ve tibbiyet seviyesi.
«Qırımnıñ üç esas problemi – vatandaşlarnıñ alçaq kârı, paalı azıq malları ve sağlıq hızmetleri. Amma daa yol, bala bağçaları problemleri bar, amma bular esas ola», – dep qayd etti Aksenov dekabrniñ 24-nde Aqmescitte matbuat konferentsiyasında.
Jurnalistniñ bu nasıl al etile bile sualine Aksenov tam bir cevap bermedi.
«Tren areketi (Keriç köpründeki tren areketiniñ açılışı – QA) sayesinde yazğa yaqın fiyatlarnı nasıl stabilleştirecegimizni añlaycaqmız. Yaşayışını kerekli kibi temin etmek içün keliri olmağan 17% vatandaşımız bar, 2024 senesine qadar 8%-ğa kelmege planlaştıramız», – dedi Aksenov.
Daa evel Qırım akimiyeti, Keriç köpründeki yük maşina areketi açılğan soñ yarımadada fiyatlar tüşecek, dep bildirgen edi. Daa soñra memurlar köpürdeki yük tren areketi açılğan soñ fiyatlar tüşecek, dep vade etken edi.
Qırımnıñ Rusiye sağlıq nazirligi yarımadada ekimler yetmegenini tanıdı.
