Rusiye Ukrainağa ücüm etkeninden berli Qırımnıñ Rusiye yolbaşçısı Sergey Aksenov ilk sefer Qırımdan esas Ukrainağa yollanılğan Rusiye arbiyleri arasında elâk olğanlar bar, dep ayttı. Bu aqta o, Telegram kanalında yazdı. Amma vefat etken qırımlılarnıñ sayısını ve olarnıñ adlarını aydınlatmadı.
«Qırımlılar mahsus arbiy operatsiyada (Rusiye akimiyeti Ukrainağa qarşı cenkni böyle adlandıra – QA) iştirak ete, Vatanımıznı ve qardaş ukrain halqımıznı qoruy, büyük cesürlik ve qaramanlıq köstere. Ne yazıq ki, vatandaşlarımız arasında arbiy borcunı yapqanda elâk olğanlar bar. Vatanları içün canını feda etken balalarnıñ tuvğanları ve yaqınlarına eñ teren ve samimiy taziyelerimizni bildiremiz. Olarnıñ qorantalarına maddiy ve maneviy yardım kösterile, biz kimseni taşlap ketmeymiz. Qaramanlar daima yaşasın!», – dep yazdı Aksenov.
Cenk başlağanından, Aqyarnıñ Rusiye yolbaşçısı Mihail Razvojayevniñ resmiy malümatına köre, şeerde 6 Rusiye arbiyi defin etildi.
Aqyarnıñ Rusiye ükümeti elâk olğan arbiylerge şeerden million ruble bermege qarar aldı.
Ukraina prezidentiniñ Qırım Muhtar Cumhuriyetindeki temsilciligi Qırım hastahaneleri Rusiyeniñ Ukrainağa qarşı cenki vaqtında yaralanğan Rusiye askerleri içün gospitaller ola, dep bildirdi. Bu malümatqa köre, Qırımnıñ şimalinde mobil gospital ve krematoriyler açıldı.
Ukrainada Rusiye ücüm etken soñ arbiy vaziyet ilân etildi (2022 senesi fevralniñ 24-ü saba saat 5:00-dan başlap 30 künge). Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete ve «Ukrainanı askeriysizleştirüv ve denatsifikatsiya» ola, dep bildire.
Ukraina Silâlı quvetleri Baş ştabı martnıñ 11-nde saba Ukrainada 12 000-den çoq Rusiye arbiyi elâk oldı, dep bildirdi. Rusiye resmiy şekilde 500 kişi elâk olğanını tanıdı. Amerika mahsus hızmetleriniñ malümatına köre, Ukrainağa ücüm etkende 2 biñden 4 biñge qadar Rusiye askeri elâk oldı. Ukrainada elâk olğan Rusiye arbiyleriniñ sayısını mustaqil şekilde bildirecek bir menba şimdilik yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
