Kreml kontrolindeki Qırım yolbaşçısı Sergey Aksenov yarımadağa qarşı ücüm yapıldı, dep bildirdi. Onıñ aytqanına köre, Rusiye ava mudafaa sisteması raketalarnı urıp tüşürdi.
Aksenovnıñ mesleatçısı Oleg Krüçkov Telegram kanalında Bağçasaray civarında raketa yoq etildi, dep yazdı. Neticede ot yanıp başlağan eken.
Muarririyet Qırımnıñ Rusiye akimiyeti aytqanı kibi raketalar tüşürildimi tasdıqlap olamay.
Sentâbrniñ 22-nde Qırım.Aqiqat mühbiri Aqyarda üç küçlü patlav oldı, dep bildirdi. Patlav dalğasından camlar titredi.
Aqyarnıñ Rusiye yolbaşçısı Mihail Razvojayev Rusiye Federatsiyasınıñ Qara deñiz flotu ştabına raketa darbesi endirildi, dep bildirdi. Ücümden soñ raketa parçaları yüz metrelerge uçtı, acele yardım maşinaları keldi, dep bildirdi Rusiye devlet kütleviy haber vastaları.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
