Qırımnıñ Rusiye yolbaşçısı Sergey Aksenov Qırımda ava mudafaa quvetleri eki ballistik raketanı tüşürdi, dep bildirdi.
Memurnıñ aytqanına köre, olarnı Ukrayına ordusı «Grom-2» OTRKdan uçurdı. Ölgen ve yaralanğanlar yoq, dep ayttı Aksenov.
Yerli Telegram kanalları yazğanına köre, saba saat 5:30-da Aqmescitte patlavlar eşitildi.
Ukrayına tarafı qabaatlavlarnı izaatlamadı.
«Grom-2» operativ-taktik raketa kompleksi («Sapsan» ihrac adı) «Yujnoye» Dnipro konstruktor bürosınıñ eseridir. Qaçqan sabıq prezident Viktor Yanukovıç vaqtında kompleks işi toqtatılğan edi. Amma müendisler devletten para almayıp işine devam etti.
2021 senesi fevral ayında Ukrayına mudafaa naziri Andriy Taran kompleks 80% azır, dep bildirgen edi. Lâkin Ukrayına akimiyeti kompleks üzerinde iş bitti dep alâ daa bildirmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
