Rusiye kontrolindeki Qırım yolbaşçısı Sergey Aksenov yarımadada terrordan qorçalanacaq bütün obyektlerni kategoriyalaştıruv ve pasportlaştıruv areketlerini qısqa vaqıt içinde faalleştirmege avale etti.
«Qırım Cumhuriyetindeki Terror ile küreş komissiyasınıñ apparatına 2020 senesi martnıñ 20-ne qadar kategoriyalaştıruv ve pasportlaştıruv tedbirleri temin etmegen şahıslarnıñ cedvelini bermek», – dep yazdı o, Facebookta.
Onıñ malümatına köre, Rusiye ükümeti bu tedbirler 2020 senesi dekabrniñ 31-ne qadar bitirilmeli, dep qarar çıqardı.
Qırım işğalinden soñ yarımadanıñ avtostantsiyaları «terrorğa qarşı» qoralarnen qapatıldı. 14 regionnıñ avtostantsiyaları içün qoralarğa «Krımavtodor» 10 million ruble sarf etti.
Aksenov terror ile küreş komissiyasınıñ apparat reberini tayinledi. Bu vazifeni kene Aleksandr Bulıçev aldı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
