İşğal etilgen Qırımda Rusiye federal leyhalarınıñ kerçekleştirilüvini Rusiye ükümetiniñ reis muavini Marat Husnullin idare etecek. Bu aqta Moskva kontrolindeki Qırım yolbaşçısı Sergey Aksenov bildirdi, dep haber ete TASS Rusiye haber agentligi.
«Keçken afta baş nazir Mihail Vladimiroviç Mişustinnen laf ettim ve Qırım Cumhuriyetiniñ kuratorı Husnullin Marat Şakirzânoviç olacaq, dep añlaştıq. Onıñnen de laf ettim, bu afta areket planınıñ tasdıqlanmasınen bağlı iş körüşüvi olacaq», – dedi Aksenov.
Qırım ve Aqyarnıñ içtimaiy-iqtisadiy inkişaf meseleleri kuratorı Rusiye baş nazir muavini Dmitriy Kozak edi. Keçken afta o, Rusiye prezidenti memuriyetiniñ reber muavini vazifesine tayinlendi.
Vladimir Putin yanvarniñ 21-nde Husnullinni baş nazir muavini vazifesine tayin etti. Bundan evel o, Moskvanıñ şeer qurucılıq siyaseti ve qurucılıq meseleleri yolbaşçısınıñ muavini edi.
