Rusiye kontrolindeki Qırım yolbaşçısı Sergey Aksenov yarımada infrastrukturası Ukraina ile tren bağlarınıñ ğayrıdan tiklenmesine yüz fayız azır, dep bildire.
Bu aqta o, TASS Rusiye agentligine bildirdi.
«Qırım 100% azır, yollarımız bozulmadı. Prezidentimiz istese, prezident Qırımnıñ hayrı içün er şeyge qoltutar, elbette, trenler olacaq <…>. Biz qoltutamız. Şimdi top olarnıñ (Ukrainanıñ – QA) tarafında», – dedi Aksenov.
2014 senesi mart ayında «Prıdniprovska zaliznıtsânıñ» Qırım müdirligi «Qırım samooboronası» tarafından zapt etildi. Aqmescit bölüginiñ reberligi birden deñiştirildi.
Daa soñra Rusiye kontrolindeki yarımada akimiyeti «Qırım demiryolu» müessisesini qurdı.
Qırım Rusiye tarafından işğal etilgeni içün 2014 senesi dekabrtniñ 27-nden başlap «Ukrzaliznıtsâ» havfsızlıq temin etmek maqsadınen Qırımnen, şu cumleden yarımadanen olğan halqara demiryol bağını kesken edi. Qırım yönelişinde qatnağan trenler yalıñız Novooleksiyıvka ve Herson stantsiyalarına qadar qatnap başladı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
