Keçken künü işğal etilgen Qırımda altı yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov. Onıñ malümatına köre, hastalar qırğınlıq ile küreş tedbirleri ve sağlam insanlarnıñ skriningi neticesinde qayd etildi. Bütün hastalar yuqunç hastahanelerine alındı, alâqada olğanlar belli, profilaktika tedbirleri keçirile.
Pandemiya başlağanından berli, akimiyetniñ malümatına köre, Qırımda 644 yañı koronavirus hastası qayd etildi. 36-sı çetelden keldi, 94-ü qomşu Rusiyeden kelgenler ve olarnen alâqada olğanlar. 452 insan yahşı oldı, 25 kişi vefat etti. Aqyarda 215 insan yañı koronavirus yuqunçına oğradı. 172 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
