Rusiye kontrolindeki Qırım yolbaşçısı Sergey Aksenov, yarımadada tarqalğan koronavirus sebebinden kinoteatrlerini qapatmağa ve bala bağçalarında karantin tedbirlerini belgilemege teklif ete. Bu aqta Qırımnıñ Rusiye ükümetiniñ saytı haber ete.
Kinoteatrleriniñ işini sıñırlav meselesini Aksenov nazirliklerge ve Rospotrebnadzor idaresine buyurdı.
Bundan ğayrı, Aksenov «epidemiologik vaziyet kerginleşse, ana-babalarğa yardım tedbirlerini azırlamağa» talap ete.
«Er şey derc etilip muzakere etilmeli, bala bağçalarında böyle tedbirler (karantin – QA) ne vaziyette kirsetilecek belgilemeli», – dedi Aksenov.
Martnıñ 24-nde Aksenov Qırımda altı yañı koronavirus hastası qayd etildi, dep ilân etti.
Hatırlatamız, Aksenov, koronavirus sebebinden özüni tecrit etüv rejimini bozğan qırımlılarnıñ cinaiy mesüliyetke çekilmesini talap ete.
Qırımda martnıñ 17-nden başlap sport, eglence ve diger kütleviy tedbirlerniñ keçirilüvi yasaqlana. Aqyarda martnıñ 19-ndan başlap bütün mektepler qapatıla, aliy oquv yurtları ise martnıñ 16-nda uzaqtan tasilge keçti. Martnıñ 17-nden itibaren Aqyarda da «yüksek azırlıq rejimi» ilân etildi.
Qırım Muhtar Cumhuriyetiniñ Prokuraturası, Qırımnı işğal etken Rusiye yarımadada koronavirus yuqunçınıñ tarqaluvından mesüliyetli ola, dep bildire.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
