Rusiye kontrolindeki Qırım yolbaşçısı Sergey Aksenovnıñ fikirince, yarımadada koronavirus hastalarınıñ sayısı test neticesinde resmiy şekilde qayd etilgenlerden çoq ola.
Bu aqta o, mayısnıñ 4-nde COVID-19 ile küreş operativ ştabınıñ toplaşuvında bildirdi.
Aksenovnıñ qayd etkenine köre, Qırımda koronaviurs testi tek keskin nefes virus yuqunçı, gripp ve pnevmoniya alâmetleri olğanlarğa yapıla.
«Qırımda koronavirus vaziyeti menfiy ilerilemesi mümkün. Şimdi qayd etilgenlerniñ sayısı artsa, menfiy tahminlerge köre, bütün observator ve hastahanelerimizni toldura bilemiz. Allah saqlasın, tibbiyet hadimleri hastalansa, sağlıq müessiseleri qalmaycaq. Menfiy tahmin bu. Bu ihtimal bayağı yüksek», – dep ayttı Aksenov ştab toplaşuvında.
Qırım yolbaşçısınıñ qayd etkenine köre, yarımadada koronavirus hastalarınıñ sayısı qayd etilgenlerden ziyade olğanını añlay.
«Biz tek keskin nefes virus yuqunçı alâmetleri olğanlarnı köremiz. Soñra koronavirus testini yaptıramız. Qalğanlarnıñ testi yapılmay, amma bu insanlar yuqunçnı tarqata», – dedi Aksenov.
Qırımda keçken künü altı koronavirus hastası qayd etildi.
Böylece, al-azırda Qırımda 111 koronavirus hastası bar, 21-i çetelden keldi, 13-ü – Rusiyeden, 77-si yerli ola. Aqyarda 89 COVID-19 hastası bar, eki kişi vefat etti.
Qırımnıñ Rusiye akimiyeti mayısnıñ 12-nden itibaren maska rejimini kirsetmege azır, dep bildirdi.
Qırımda yüksek seviyeli azırlıq rejimi mayısnıñ 11-ne qadar uzatıldı.
«Qırım aq qorçalayıcı gruppası» bildirgenine köre, aprelniñ 13-nden 19-na qadar işğal etilgen Qırımda ve Aqyarda resmiy şekilde qayd etilgen COVID-19 hastalarınıñs ayısı aman-aman eki qat arttı. Aq qorçalayıcılar, monitoring vaqtında elde etilgen malümat Rusiye akimiyeti derc etken resmiy raqamlarnıñ kerçek olmağanını köstere, dep bildire.
Ukraina prezidentiniñ Qırım Muhtar Cumhuriyetindeki daimiy temsilciligi de aynı qorqularını bildire.
ABD OSCE elçisi James Gilmore emin ki, işğal etilgen Qırım COVID-19 pandemiyasından zarar köre, amma «Rusiye qorquzğanı» içün yarımadadaki epidemiologik vaziyetke dair kerçek malümat yoq.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
Ukraina prezidentiniñ Qırım Muhtar Cumhuriyetindeki daimiy temsilciligi de bundan qorqa.
