Rusiye kontrolindeki Qırım yolbaşçısı Sergey Aksenov, işğal etilgen Qırımda 40 biñge yaqın student oquy, dep bildirdi. Bu aqta o, Facebookta yanvarniñ 25-nde qayd etilgen Rusiye Student künü munasebetinen yazdı.
«Qırım aliy oquv yurtlarında 40 biñge yaqın student oquy – bu küçük bir şeerniñ ealisi. Daa 32 biñden çoq kişi orta zenaat tasilini ala. Bizim studentlerimiz – büyük bir intellektual ve icadiy küç».
Onıñ aytqanına köre, «Qırım studentlerniñ bilgisi, energiyası ve qabiliyetine muhtac».
«Aliy oquv yurtları Qırımnıñ sanayı, tehnologik, içtimaiy ve gumanitar inkişafınıñ areket küçü olmaq kerek. Ükümet iqtisadiyat ve içtimaiy saanıñ bütün pıtaqlarına genç mütehassıslarnı celp etmege, qabiliyetli genç insanlarğa qoltutmağa devam ete», – dep yazdı o.
Herson vilâyetiniñ akimiyeti işğal etilgen Qırımnıñ memuriy sıñırında tasil malümat noqtalarını açmağa teklif etken edi.
Soñki üç yıl içinde qırımlılarnıñ esas Ukrainada aliy oquv yurtlarına oqumağa kirmek içün faydalanğan «Qırım – Ukrainadır» tasil merkezleriniñ sayısı aman-aman üç qat arttı, şimdi olarnıñ sayısı 35 oldı.
Ukraina tasil ve ilim nazirligi Qırım ve Donbastan kelgen abituriyentler içün adım-adım talimatlarnı derc etti.
