Qırımnıñ Rusiye yolbaşçısı Sergey Aksenov Rusiye İqtisadiy inkişaf naziri Maksim Reşetnikovdan yarımadada köy hocalığı topraqlarını suvarmaq içün suv teminlevi problemini çezmesini rica ete. Bu aqta Rusiye nazirliginiñ matbuat hızmeti bildire.
Qayd etilgenine köre, video bağı vaqtında Aksenov ve Reşetnikov «bank institutlarınıñ eksiklikleri, suv resurslarınıñ qıtlığı, Qırım istisacıları içün sanktsion sıñırlavlar problemi aqqında laf ettiler. Bundan ğayrı, Qırım infrastrukturasınıñ inkişaf seviyesinen bağlı vaziyet muzakere etildi».
İyünniñ 11-nde Qırımnıñ Rusiye yolbaşçısı Sergey Aksenov Taygan suv anbarını Aqmescitniñ suv teminlevi sistemasınen vaqtınca birleştirecek suv boruları Rusiyeden Qırımğa keldi, dep bildirgen edi. İyülniñ 8-nde berilgen malümatqa köre, yaqın suv anbarlarınıñ yedeklerinde Aqmescit içün 110 künge suv qaldı.
Rusiye kontrolindeki Qırım yolbaşçısı Sergey Aksenovnıñ bildirgenine köre, 2020 senesi 150 yıl içinde eñ qurğaq oldı. Qırımnıñ Rusiye ükümetiniñ reisi Yuriy Gotsanük bildirgenine köre, yarımada esas Ukrainadan Şimaliy-Qırım kanalı üzerinden Dnipro suvınıñ berilüvine muhtac degil.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
