Kütleviy haber vastalarınıñ haberine köre, Aksenovnıñ namzetine Qırımda Rusiye parlamentiniñ toplaşuvında iştirakçilerniñ 100%-ı rey berdi.
Daa eki namzet – Rusiye kommunistler firqası fraktsiyasından Sergey Bogatırenko ve Aleksey Gurinenko («Yañı insanlar») – üç ve sıfır rey aldılar, dep haber ete Rusiye matbuatı.
Qırımnıñ Rusiye parlamentiniñ reisi olaraq yañıdan Vladimir Konstantinovnıñ saylanğanı da belli oldı.
İnterfaks Rusiye neşiri haber etkenine köre, qanunsız saylavlarda Rusiye Federatsiyasında ükümdar «Yedinaya Rossiya» firqasınıñ cedveliniñ başında olğan Aksenov bundan evel deputatlıq vekâletlerinden ketken edi.
51 yaşında Aksenov 2014 seneniñ oktâbr ayından başlap Rusiyeniñ Qırım yolbaşçısı vazifesinde buluna. 2019 senesi sentâbr ayında Rusiye nezareti altındaki Qırım parlamenti tarafından ekinci müddetke yañıdan saylanğan edi.
Qırım Rusiye saylav komissiyasınıñ malümatına köre, Rusiye kontrolindeki Qırım parlamentine «Yedinaya Rossiya» (reylerniñ 74,87%-ı), LDPR (reylerniñ 5,71%-ı) ve KPRF (reylerniñ 5,15%-ı) keçkenler. Malışevniñ aytqanına köre, saylayıcılarnıñ 47,61%-ı iştirak etti, 702 141 kişi rey berdi.
Sentâbrniñ 6-dan 8-ne qadar Rusiye akimiyeti qanunsız bir şekilde ilhaq etken Qırım ve Aqyarda Rusiye Federatsiyası tarafından meydanğa ketirilgen Qanuncılıq Meclisine, Rusiyeniñ nezareti altındaki Qırım Parlamentine, em de şeer ve köy şuraları deputatlarınıñ qanunsız saylavları keçirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
