Rusiye kontrolindeki Qırım yolbaşçısı Sergey Aksenov, aprelniñ 2-nde koronavirus yuqunçınıñ tarqaluvına qarşı tedbirler operativ ştabında iştirak etmeycek, dep bildirdi.
«Qırımnıñ sıñırında keçiş noqtalarını teftiş etem», – dep yazdı Aksenov Facebookta.
Angi keçiş noqtaları aqqında aytılğanını aytmadı.
Qırımdaki Rusiye FSBsiniñ sıñır idaresiniñ matbuat hızmeti, koronavirus tarqaluv vaziyetinde memuriy sıñırdaki keçiş noqtalarından esas Ukrainağa kirişni vaqtınca yasaqladı, dep bildirdi.
Rusiye FSBsiniñ sıñır idaresi martnıñ 18-i saat 00-dan itibaren esas Ukrainadan Qırımğa «çetel vatandaşlarını» almay.
Vaqtınca işğal etilgen topraqlarnıñ reintegratsiya meseleleri nazirliginiñ martnıñ 17-nde bildirgenine köre, Qırım ve Herson vilâyetiniñ memuriy sıñırındaki keçiş noqtalarından keçüv aprelniñ 3-ne qadar sıñırlandı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
