Aqyardan soñ işğal etilgen Qırımda da yaqarlıq satıluvı sıñırlana – bir kişige eñ çoq 30 litr. Bu aqta Rusiye tayin etken Qırım yolbaşçısı Sergey Aksenov bildirdi.
«Bugünden başlap yaqarlıq satıluvı sıñırlana – bir kişige eñ çoq 30 litr. Qırımlılardan benzinni yedeklememege ve naqliyat vastalarını adiy rejimde toldurmağa rica etem», – dep yazdı memur Telegram kanalında.
Aksenovnıñ aytqanına köre, yaqın 30 künge benzin fiyatları aqqında añlaştılar:
Aİ-92 – bir litr içün eñ yüksek fiyat 70 ruble
Aİ-95 – bir litr içün eñ yüksek fiyat 76 ruble
Aİ-95 «Premium» – bir litr içün eñ yüksek fiyat 80 ruble
Aksenovnıñ bildirgenine köre, Qırımnıñ Rusiye Yaqarlıq ve energetika nazirliginiñ saytında yaqarlıq olğan yaqarlıq stantsiyalarınıñ adresleri yazılacaq.
Bugün aynı qarar aqqında işğal etilgen Aqyarnıñ Rusiye akimiyeti de bildirdi.
Regionnıñ yaqarlıq stantsiyalarında tek 95ULTRA ve A100 benzinleri peyda oldı, amma eñ çoq A95 ve A92 talap etile.
Berilgen malümatqa köre, Qırım soñki yıllarda eñ büyük yaqarlıq buhranını yaşay. Rusiye akimiyeti bunıñ Rusiyede cermay işlenmesiniñ eksilmesinen bağlı olğanını tanıy. Bunıñ sebebi Ukrayina uçucısızlarınıñ Rusiye cermay zavodlarına qarşı muntazam ücümleri oldı.