Aprelniñ 17-nde Aqşeyh ve Aqmeçit rayonlarında saat 8-den saat 13-ke qadar Rusiyeniñ «BARS-Krım» bölükleri ve diger Rusiye uquq qoruyıcılar qurulışlarınıñ talimleri keçirilecek. Bu aqta Qırımnıñ Rusiye yolbaşçısı Sergey Aksenov bildirdi.
«Talimlerniñ maqsadı – duşmannıñ diversion gruppalarınıñ cumhuriyetke kirmesine mania olmaq. Talimlerniñ formatı teşkerip baquv tedbirlerini talap etmey», – dep yazdı Aksenov Telegram kanalında.
Memurnıñ aytqanına köre, talimler vaqtında mobil bağ söndürile bile.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa baqqanda büyük artış bar: 2023 senesi 40 talim, 2022 senesi 20 talim, 2021 senesi 44 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
