Qırımnıñ Rusiye yolbaşçısı Sergey Aksenov Aqmescit rayonında boğday taşığan vagonlar relsten çıqqanını tasdıqladı. Bu aqta o, Telegram kanalında yazdı.
Memurnıñ aytqanına köre, yaralanğanlar yoq.
«Aqmescit-Aqyar yolunda elektrik trenlerniñ areketi toqtatıldı. Yolcular içün avtobuslar olacaq. Vaziyetni kontrol altında tutam», – dep yazdı Aksenov.
Adise sebepleri aqqında memur bildirmedi.
Aynı vaqıtta, RİA Novosti Qırım demiryolunıñ malümatına esaslanıp, yük treniniñ relsten çıqması «başqa şahıslarnıñ demiryol naqliyatınıñ işine kirişüv» sebebinden oldı, dep yaza.
Baza, 112 ve Mash Telegram kanallarınıñ malümatına köre, beş boğday vagonı Aqmescit rayonında relslerden çıqtı. Tren yolunda patlav aqqında da haber etile.
Mayısnıñ 10-nda Azatlıq Radiosınıñ leyhası olğan Qırım.Aqiqat jurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti.
Obyektler arasında – infrastrukturalı arbiy uçaq alanları, gemi ve katerlerniñ yerleri, silâ anbarları, arbiy şeerçikler, arbiy bölükler, idare noqta ve ştabları, arbiy tehnika parkları ve ava mudafaa nevbetçilik yerleri, poligon ve oquv merkezleri, bazı arbiy-sanayı kompleksiniñ müessiseleri.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
