Qırımnıñ Rusiye yolbaşçısı Sergey Aksenov Aqmescit ava limanına Qırım ressamı İvan Ayvazovskiyniñ adını bermege teklif ete. Bu aqta o, Facebookta yazdı.
«Aqmescit ava limanına İvan Konstantinoviç Ayvazovskiyniñ adı berilmesine rey berdim. Mence, Ayvazovskiyniñ sıması çoq milletli Qırım içün bir timsal ola», – dep yazdı Aksenov.
Qırımnıñ Rusiye yolbaşçısı, Aqmescit ava limanınıñ mimarcılığı ve adı «ulu yurtdaşımıznıñ icadınen bir» olğanını tüşüne.
Qırımda «Aqmescit» ava limanına berilmesi mümkün 10 addan ibaret cedvel tasdıqlanğan edi. Ayvazovskiyden ğayrı, cedvelge Rusiye çariçesi II Yekaterina, şair ve terciman Maksimilian Voloşin, Rusiye admiralı Pavel Nahimov, Qırımda şarapçılıqnıñ temelcisi, knâz Lev Golitsın, qırımtatar maarifçisi ve felsefeci İsmail Gasprinskiy, hirurg ekimi Nikolay Pirogov, yazıcı ve dramaturg Anton Çehov, alim Dmitriy Mendeleyev, yazıcı Aleksandr Grinniñ adı kirsetildi.
Aprelniñ 16-nda Aqmescitte ava limanınıñ yañı terminalı açılğan edi. Onı 22 ayda ve aman-aman 500 mln dollarğa qurğanlar.
2014 senesi mart ayında Rusiye yarımadanı işğal etken soñ Qırım ava limanları Ukraina ükümetiniñ qararınen qapatılğan edi. Anda ve andan uçaq seferleriniñ kerçekleştirilmesi Ukraina qanunlarını ve halqara qaidelerni boza.
