Qırımnıñ rusiyeli başı Sergey Aksönovnıñ resmiykeliri beş yıl devamında eki kere arttı, qadınınıñ ise - dört kere. Rusiyeli Qırım akimiyetiniñ saytında derc etilgen Aksönovnıñ keçken yıl beyannamesine köre, o, 2,9 million ruble qazandı. 2014 senesi Qırım başınıñ keliri 1,6 million ruble edi.
Aksönovnıñ qadını, Yelena Aksönova 2014 senesi deyerli 3 million ruble qazandı, keçken yıl ise onıñ keliri 13 million ruble edi.
Amma 2016 senesi beyannamede o 32 million rubleni qayd etti.
Aksönovnıñ 607 metr kvadratlıq toprağı ve 577,5 metr kvadratlıq mesken evi bar. Qırım başlığınıñ maşnaları yoq.
Onıñ qadınında üç kvartira ve altımesken olmağan bina bar. Bundan ğayrı, onıñ BMW 750 LI XDRIVE yengil maşnası bar.
Qırımnıñ rusiyeli parlamentiniñ spikeri Vladimir Konstantinov 2018 senesi alğan keliri aqqında malümatnı aydınlattı. Yarımada parlamentiniñ saytında derc etilgen bildirüvge köre, Konstantinovnıñ keliri 6 million 955 biñ ruble oldı, bu ise 2017 senesi içün derc etilgen resmiy kelir malümatına köre, üç kere azca: o yılı vesiqalarda 22 million rubleden çoq yazılğan edi.
2018 senesiniñ kelir beyannamelerine köre, Qırımnıñ rusiye parlamentiniñ eñ bay mebusı OOO “FM” şirketi”niñ başı Frunze Mardoyan oldı. Qırım parlamentiniñ saytında yerleştirilgen resmiy malümatqa köre, 2018 senesi Mardoyannıñ resmiy keliri 103,4 million ruble oldı.
