Link açıqlığı

Tanılmağan Qırım Cumhuriyetiniñ yolbaşçı vazifesini eda etken, Qırımnıñ öz başına tayin etilgen baş naziri Sergey Aksönov matbuat konferentsiyasında bildirdi ki, Ukrain gimnaziyası ukrain olğanı kibi öyle de ukrain mektebi olıp qalacaq. Bunı onıñ matbuat hızmeti bildire.

«Ukraina akimiyeti Rusiyenen bağlı er şeyni yoq etse de, bizler böyle yapmaycaqmız, biz, aksine, bu gimnaziyağa er taraftan qol tutacaqmız», – dep ayttı Aksönov.

Onıñ aytqanına köre, oña berilgen malümatqa binaen, gimnaziya reberligi ocalar ve uyken sınıflarnıñ talebelerini qorquzıp, referendumda iştirak etmege yasaq etken eken.

Aprel 10-da Aqmescitteki Ukrain gimnaziyasınıñ müdiri Natalya Rudenko «Aksönovnıñ halq imayesi» ve Aqmescit şeer şurası memurlarınıñ tesiri altında bulunıp, işten çıqmaq içün ariza yazmağa mecbur oldı. Rudenko arizada «taraflar añlaşqanına esaslanıp», dep qayd etti.

Ukraina tasil ve ilim Nazirligini müdirniñ işten boşatıluvı pek açuvlandırdı. Nazirlik bu vaqianı «işğalciler ve Qırım yarımadasınıñ öz başına ilân etilgen akimiyetiniñ repressiya areketleri, em de ukrain mektepleri ve ocalarını sıqıştıruv» olaraq tanıdı.
XS
SM
MD
LG