Rusiyeniñ nezareti altında olğan Qırım yolbaşçısı Sergey Aksönov Bilgi künü munasebeti ile tantanalı tedbirler yalıñız birinci, doquzıncı ve on birinci sınıflar içün ötkerilecek dep bildirdi. Bunıñ aqqında o öz telegram kanalında yazdı.
Onıñ sözlerine köre, böyle qarar "telükesizlik temin etmek maqsadınen" tayın etilgen.
"Aynı zamanda er bir mektep istegeni kibi tedbirni teşkil ete bile. Bütün talaplarğa riayet etilse, büyük olmağa köy mektepleri tedbirde iştirak ete bilecek sınıflarnıñ sayısını arttıra bile", - dep qoştı o.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
