Qırımda terror telükesiniñ yüksek ("sarı") seviyesi kene uzattırıldı. Bunı Rusiyeniñ nezaretinde olğan Qırımnıñ yolbaşçısı Sergey Aksönov bildirdi.
"Qırım Cumhuriyetiniñ ve onıñ vatandaşlarınıñ telükesizligini ve antiterroristik mudafaasını temin etmek maqsadınen Ermeni Bazar, Canköy, Keriç, Kranoperekopsk bölgeleri ve Canköy, Kranoperekop Yedi quyu rayondarında 2022 senesi dekabrniñ 7-nde saat 20-den 2022 senesi dekabrniñ 22 saat 20-ge qadar yüksek ("sarı") terror telükesi faaliyet kösterecek", - dep yazdı o.
Bundan ğayrı, işğal etilgen Qırımnıñ bütün infraterkip obyektlerinde yüksek seviyeli terror telükesi ile bağlı tedbirler devam ettirilecek.
Yüksek terror telükesi Qırımda aprelniñ 11-nde ilân etildi. Aqyarda – avgustnıñ 1-nde. Onı bir qaç kere uzatqan ediler.
Oktâbrniñ 19-nda RF prezidenti Vladimir Putin işğal etilgen Donetsk, Lugansk, Zaporijjâ ve Herson vilâyetlerinde arbiy vaziyetniñ tayin etilmesi aqqında ferman imzalağan. Bunı o RF Telükesizlik Şurasınıñ oturışında çıqışta bulunğanda bildirdi.
Bundan ğayrı Putin işğal etilgen Qırım ve Aqyarda ve Rusiyeniñ Ukrayina ile sıñırdaş olğan bir sıra bölgelerde "orta seviyeli cevap tedbirlerini" tayin etti.
Putinniñ buyruğına köre, işğal altındaki Qırım ve Aqyarda «orta seviyeli cevap» kirsetildi. Bir sıra sıñırlav olması beklenile. Qırımnıñ Rusiye yolbaşçısı Sergey Aksenov Qırımda komendant saatı ve Qırımğa kiriş sıñırlavları şimdilik kirsetilmeycek, dep bildirdi.
oskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
