Qırımnıñ Rusiye yolbaşçısı Sergey Aksönov yarımadada 500 ekim ve biñge yaqın kiçik ve orta tibbiy hadim yetmey, dep bildirdi.
"Maqsadımız - hastalarnıñ yaşağan yerinde ihtisaslı tibbiy yardım köstermek, olarğa başqa şeerge kelmek kerekmey", - dep qayd etti memur.
Aksönovnıñ fikirince, baş ekimler "vaziyetni şahsen nezaret altında tutmalı": kadrlarnı saylav teşkilâtları ve oquv yurtlarınen bağ tutmalı.
Qırımdaki tibbiy hadimlerniñ qıtlığı ile vaziyet 2021 senesi daa kerginleşti, üç yıl içinde hadimlerniñ sayısı 2019 senesi 86%-dan 2021 senesi 80%-ğa qadar eksildi.
Aqyarda Rusiye arbiy hızmetçileriniñ tedaviylenüvinen oğraşqan ekimlerniñ ğayretleri sebebinden yerli sakinler içün tibbiy yardımnıñ azlaşqanını qayd eteler.
2022 senesi Aksönov qırımlılar arasında ilhaq etilgen Qırımda sağlıq saqlav seviyesi ile narazılıq artqanı aqqında bildirdi. Aluştalı faal Aleksandr Rusakov Qırım.Aqiqatqa bergen izaatında, bunıñ esas sebebi - ekimlerniñ maaşlarınıñ pek alçaq olması, dep qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
