Qırımnıñ Rusiye yolbaşçısı Sergey Aksönov İslâm Terek rayonında demiryolnıñ bozulması aqqında bildirdi.
"Tamir işler tahminen 4-8 saat devam etcek", - dep yazdı o.
Memurnıñ sözlerine köre, zarar körgenler yoq, qaza yerinde bütün kerekli hızmetler çalışa eken. Qaza sebepleri şimdilik belli degil.
Demiryolnıñ bozulması sebebinden uzaqtan kelgen eki tren ve eki yerli tren keç qala.
Mustaqil menbalardan bu malümatnı teşkermek şimdilik imkânsızdır.
İyünniñ 21-nde saba Qırımnıñ işğal reberligi Kefede demiryol toşemesiniñ bozulması aqqında haber etken edi.
Mayısnıñ 18-nde Aqmescit rayonında zahire taşığan vagonlar relsten çıqqan edi. Qırımnıñ işğal parlamentiniñ spikeri Konstantinov qazağa "patlatuv" dedi ve bunda Ukrayinana qabaatlaı.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
