Qırımnıñ rusiyeli başı Sergey Aksönov, Keriç mer muavini Dilâver Melgaziyevni vazifesinden boşatmağa emir etti.
Bu aqta o Keriç memuriyetiniñ muşaveresinde ilân etti. Muşavere videosı Aksönovnıñ Facebook saifesinde yerleştirilgen.
Aksönov bildirgeni kibi, fevral 21-inde saba o “Kerçgortrans” işhanesinde bulunıp, işçilernen qonuştı. Bundan soñ Melgaziyevni rutbesinden boşatmaq qararını aldı. Bundan ğayrı Qırım bası şeer azbar hızmetçileriniñ işinden de memnün qalmadı.
Keriç trolleybus aydavcıları, ruhset vesiqaları olmağanından, naqliyatnı yolğa çıqarmadı, dep bildire matbuat.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
