Link açıqlığı

Bağçasaray tarihiy-medeniy qoruğınıñ baş müdiri Valeriy Naumenko işten çıqmaq içün ariza yazdı. Onı endi imzaladılar.

Bunı Bağçasaray qoruğınıñ sabıq baş müdiri tünevin Qırım nazirler Şurasında Qırım baş nazirinen keçirilgen toplaşuvdan soñ hadimlerine bildirdi, dep haber ete qha.com.ua.

«Qarar alındı. Bugünden başlap men qoruqnıñ müdiri degilim. Baş nazirge (Qırımnıñ öz başına tayinlengen Sergey Aksönov – muarrir) bir şey añlatıp olamadım, şu sebepten ariza imzalandı. Yarından başlap men qoruqnıñ baş müdiri degilim. Baş nazirniñ kendi sebepleri bar, müessiseni inkişaf etüv boyunca fikirleri mevcut», – dedi o.

Naumenkonıñ aytqanına köre, bugün Aksönov Bağçasarayğa barıp, qoruqnıñ hadimlerinen körüşecek.

Kütleviy haber vastalarınıñ malümatına köre, Bağçasaray tarihiy-medeniy qoruğınıñ baş müdir vazifesine Bağçasaray rayon devlet memuriyetiniñ yolbaşçı muavini Elmira Ablâlimova tayin etilmesi mümkün.
XS
SM
MD
LG