Rusiye nezaretindeki Qırım başı Sergey Aksönov, yarımadada ekspress poyezdini yibermege niyetlengenlerini bildirdi.
Bunı o, öz Facebook saifesinde yazdı.
"Aqmescit ava limanından Qırımnıñ esas turistik yerlerine ekspress poyezdini yibermesi aqqında tüşünemiz. Şimdilik bu mesele boyunca çalışacaq iş gruppasınıñ teşkil etilmesine azırlıq yapıla", - yazdı Aksönov.
2014 senesi mart 26 künü Kremlge bağlı olğan Qırım parlamenti tarafından «Qırım demiryolları» devlet müessisesi teşkil etilgeni aqqında haber etilgen edi.
Qırımnıñ Rusiye tarafından ilhaqı munasebeti ile 2014 senesi dekabrniñ 27-sinden başlap «Ukrzaliznıtsâ», telükesizlikni temin etmek maqsadınen Qırım ile demiryol alâqasını kestirdi ve yarımadağ qatnağan halqara trenlerini lâğu etti. Qırım doğrultısında qatnağan trenler yalıñız Novoalekseevka ve Hersonğa qadar bara ediler.
