Rusiye nezaretindeki Qırım Nazirler Şurasınıñ yañı terkibini dekabr 4-ünde kösterecekler, dep salı künü jurnalistlerge haber etti Qırımnıñ rusiyeli başı Sergey Aksönov.
"Yarın bütün yañı terkipniñ cedveli derc etilecek, bugün muzakereler yekünlenecek. Men, vazifeni almağa istegen 20-den ziyade yañı adamnen subetleştim, olardan ğayrı nazirliklerde ve müessiselerde evelde reber olıp çalışqanlar oldı", - dep yazalar Aksönovnıñ laflarından matbuatta.
Sentâbr 20-sinde Qırım parlamentiniñ sessiyasında Aksönovnı kene beş yıllıq müddetke Qırım başı olaraq sayladılar. Qırım ükümeti bütünley istifağa çıqtı.
