Akimiyetke qol tutqan «Millet» qırımtatar telekanalı Qırımnıñ Rusiye İnformatsiya nazirligine keçirildi. Bu aqta Kreml kontrolindeki Qırım ükümetiniñ buyruğında aytıla.
Bundan evel telekanalnı Qırımnıñ Milletlerara munasebetler devlet komiteti idare etken edi.
Kütleviy haber vastasınıñ bir müessiseden başqasına keçirüv sebepleri qayd etilmey7
İyül ayında Qırımda Rusiye politsiyası ve Esap palatasınıñ hadimleri akimiyetke qol tutqan «Millet» qırımtatar telekanalında tintüv keçirgen edi.
Rusiye kontrolindeki Qırım yolbaşçısı Sergey Aksenov «Millet» hadimlerine yañı reberleri Lilâ Vecatnı taqdim etti.
Bundan evel Vecat «Millette» öz leyhalarını ve haberlerni alıp barğan, daa soñra «Krım 24» telekanalında mühbir olıp çalışqan, ve belli bir vaqıt onıñ Yaltadaki bölügini idare etti.
Fevral ayında «Milletniñ» sabıq baş müdiri Ervin Musayev istifağa çıqtı. Musayev 2017 senesi iyül ayında Rusiyege qol tutqan «Millet» qırımtatar telekanalınıñ baş müdiri olaraq tayin etildi.
2015 senesi aprelniñ 22-nde Aksenovnıñ buyruğınen «Millet» adını alğan «Qırımtatar cemaat teleradiokompaniyası» ve «Vetan sedası» radiosı mustaqil ticaretten tış teşkilât qurulğan edi. Avgustnıñ 28-nde Roskomnadzor Qırımtatar cemaat teleradiokompaniyasına «Millet» telekanalı ve «Vetan sedası» radiosınıñ yayınları içün litsenziyanı berdi. 2015 senesi sentâbrniñ 1-nde «Millet» test rejiminde yayınlarına başladı.
