Link açıqlığı

Ukraina baş naziri Arseniy Yatsenük bildire ki, 2012 senesi iyülniñ 3-de parlament tarafından qabul etilgen devlet til siyasetiniñ esasları aqqında qanun lâğu etilmeycek.

«Kolesniçenko-Kivalovnıñ qanunı lâğu etilmeycek. Bu qanun Ukraina ealisiniñ rus tilli qısımınıñ menfaatlarını temsil ete. Ukraina ükümetiniñ til meselesine munasebeti deñişmeycek», – dep ayttı o.

«İç bir kimse ve iç bir vaqıt rus tilini sıñırlamaycaq ve Ukrainada onı qullanmağa yasaq etmeycek», – dep qayd etti Yatsenük.

O, şunı ayttı ki, bugünki esas vazife – «barışıq, tınçlıq ve bir devletni saqlamaqtır».

Ukraina Yuqarı Radası 2014 senesi fevralniñ 23-de 2012 senesi iyülniñ 3-de qabul etilgen devlet til siyaseti esasları aqqında qanunnı küçsüz dep tanıdı. Bu qanun milliy azlıqlar ealiniñ 10% ziyadesini teşkil etken regionlarda eki til olmasına imkân bere edi.

İşbu qanunnıñ lâğu etilmesi Ukrainanıñ bir sıra regionlarında cemaatçılıqnı açuvlandırdı.

2014 senesi martnıñ 3-de Ukraina prezidentiniñ vazifelerini eda etken Aleksandr Turçinov Ukraina Yuqarı Radasınıñ mezkür qararını imzalamaycağını bildirdi.

2014 senesi martnıñ 4-de parlament Ukrainada til inkişafı ve qullanuvı aqqında Ukraina qanun leyhasını azırlaycaq mahsus komissiyanı meydanğa ketirdi.
XS
SM
MD
LG