Qırımdaki suv qıtlığı 2021 senesiniñ mevsiminde turist aqınına tesir etmeycek, dep tüşüne Rusiye kontrolindeki Qırım yolbaşçısı Sergey Aksenov. Bu aqta o, iyünniñ 4-nde Peterburg halqara iqtisadiyat forumında ayttı.
«Qırım bu yıl 10 millionnı qabul ete bile. Biletlerge baqıp köremiz: Aqmescit ava limanı 6 milliondan çoq yolcu qabul etecek», – dep bildire Aksenovnıñ aytqanlarını TASS.
Sergey Aksenov, suv vaziyeti aqımdaki sene «daa yahşı olacaq», çünki yarımadanı stabil suv teminlevi planınıñ esas tedbirleri yerine ketirilecek, dep qoştı.
Aksenovnıñ qayd etkenine köre, onıñ fikirince, Qırımda hızmet keyfiyeti turist aqınına menfiy tesir ete bile.
Hatırlatamız, Qırım Gidromettsentriniñ malümatına köre, Aluşta, Sudaq ve Kefe özenleri qurıp qalmağa devam ete.
Bundan evel Qırımnıñ Gidromettsentri tabiiy aqım suv anbarlarında suv kelüvi mayısta «bayağı eksildi», dep bildirdi.
Sergey Aksenov, Qırım suv teminleviniñ «buhran tübüni» keçti, dep bildirgen edi.
Rusiye baş nazir muavini Marat Husnullin Qırımda bulunıp, yarımada «yaqın yıllarğa suvnen temin etildi», dep işandırdı. O, yaznıñ başında yarımadanı tehnik suv ile temin etecek quyular qazılacaq, dep ilân etken edi.
Aqyarnıñ Rusiye ükümeti şeer hocalığı departamentiniñ müdir muavini Sergey Juravlev Çernoreçenskoye suv anbarınıñ suv yedekleri aynı şekilde qullanılsa, şeer 2022 senesi yanvar ayına qadar suvnen temmin etilecek, dep ayttı.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
