Rusiye kontrolindeki Qırım sağlıq nazirligi yarımada ealisine koronavirus aşısını yaptırmağa azırlana. Bu emirni qış başında qomşu Rusiye reberliginden alacaqlar.
Bu aqta Kreml kontrolindeki Qırım sağlıq naziri Aleksandr Ostapenko «Krıminform» Qırım neşirine bergen intervyüsı ayttı.
«Dekabrniñ 1-nden emir bekleymiz, er şey federal merkeznen bağlı. Qısqa vaqıt içinde aşılarnı yapacaqmız», – dedi o.
Hatırlatamız, «Sputnik V» Rusiye aşısı sınavlarınıñ bazı iştirakçileriniñ koronavirus testi müsbet çıqtı.
Oktâbrniñ 22-nde bildirilgenine köre, Qırımda ilk tibbiyet hadimlerine Rusiye koronavirus aşısı yapılıp başladı.
Oktâbrniñ 29-nda Qırımda COVID-19 Rusiye aşısı ekimlerge yapılıp baqıldı.
Bundan evel Aqyar akimiyeti COVID-19 aşısını alğan ilk tibbiyet hadimleri aqqında esabat berdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
