Yarımadanıñ Rusiye akimiyeti alğan tedbirlerge baqmadan, koronavirusqa oğrağan qırımlılarnıñ sayısı arta. Qırım ve Aqyarda koronavirus yuqunçınıñ tarqaluvına yol bermemek içün «yüksek seviyeli azırlıq» rejimi ilân etildi. Qırımda özüni izolâtsiya etüv rejimi aprelniñ 30-na qadar, Aqyarda aprelniñ 12-ne qadar uzatıldı.
«Özüni izolâtsiya etmemek – aselet yuqturmaqtır, bunıñ cezası bar. Bir aman olamaz», – dep ayta Kreml kontrolindeki Qırım yolbaşçısı Sergey Aksenov.
Qırımlı siyasetçi, Rusiye Kommunist firqasınıñ sabıq azası Spetan Kiskin yarımadada koronavirus tarqaluvına qarşı tedbirlerni izaatlap, akimiyet böyle telükege azır degil edi, dep qayd etti.
«Koronavirus – apansızdan çıqqan, pek ciddiy ve telükeli bir şey. Oña qulaq asmağa ve hafif almamağa kerek. Şunıñ içün federal seviyede ve Qırımda, region seviyesinde, akimiyet bu meselege ciddiy yanaştı. Lâkin belediyeler seviyesinde böyle mesüliyet pek alçaq ya da iç yoq. Yaşağan Aqmescit şeerine köre ayta bilem. Pandemiya vaqtında memuriyetniñ fevqulâde vaziyet içün yedegi yoq, areket planı yoq, eali ile bağ yoq, teşviqiy ve profilaktika işi pek az. Şeer memuriyeti özüni izolâtsiya etti sanki, koronavirus ile küreş qararlarını Sergey Aksenov yolbaşçılığında cumhuriyet ştabı ala kibi kele», – dep izaatladı vaziyetni Qırım.Aqiqatqa siyasetçi.
Qırımnıñ Rusiye tarafdarı cemaatçısı ve iş adamı Boris Yaremkonıñ fikirince, yarımadada koronavirus tarqaluvına qarşı tedbirler kereginden çoq oldı,
«Alınğan tedbirler qabartıldı. Qırımda qırğınlıq yoq – bir-eki hasta bar! Amma epimizni izolâtsiyağa yolladılar. Nasıl yaşaycaqmız? Bir yerge barmaycaqmızmı? Er bir qırımlı devlette çalışmay, ve er ay aylıq almay. Tezden aşacaq şeyimiz qalmaycaq», – dep bildirdi fikrini Qırım.Aqiqatqa cemaatçı.
Qırımğa köçken rusiyeli bloger Aleksandr Gornıy emin ki, kerek olsa, Qırımda karantin tedbirleri quvetleştirilecek.
«Vaziyet bir qarar. Ştab ve akimiyetniñ işini közetip, vaziyet kontrol altında buluna, dep ayta bilem. Çoq şükür, qabartmaylar. Qırım qorqunç Moskva stsenariylerine oğramaycağına inanmağa isteyim. Şunı da qayd etmeli ki, Qırımda Aksenovğa pek qol tutalar, diger regionlarnıñ valilerinde bu yoq, ve eminim, epidemiologik vaziyet kerginleşse, onıñ ricası Qırım sakinlerini azırlar ve karantin tedbirlerini qolay quvetleştire bile», – dep ayttı Qırım.Aqiqatqa bloger.
Qırımnıñ Rusiye tarafdarı keriçli faal Stepan Gluhovnıñ fikirince, qoruv maskalarınıñ olmaması Qırımnıñ qırğınlıqqa azır olmağanını kösterdi.
«Maskalarnıñ qıtlığı böyle fevqulâde vaziyetke azır olmağanını kösterdi. Qıtlıq spekulâtsiya sebebi oldı. Aprelniñ 3-nde Keriç politsiyasına 102 nomera vastasınen telefon etildi, amma cevap alınamadı. Nevbetçi külip cevap berdi: «Bu cinayetmi? Aydı, bir şeyler yapmağa tırışırmız». Büyük ciddiyet ve mesüliyet kerek olğanda böyle şeyler ola», – dep bildirdi Qırım.Aqiqatqa faal,
«Serbest Qırım» cemaat birleşmesiniñ faali Reşad Memetov Qırım.Aqiqatqa izaat berip, koronavirus pandemiyası yarımadadaki Rusiye akimiyetiniñ böyle vaziyetlerge azır olmağanını kösterdi, dep qayd etti.
«Bu vaziyet ealini pek açuvlandıra. Akimiyet böyle vaziyetke ne içün azır degil? Olar azır olmağanda mecburiy izolâtsiyağa yollanılğan qırımlılar ne içün zarar köre? Özüni izolâtsiya etüv rejiminiñ bozuluvına dair protokollarnı tizmezden evel regionnı virus tarqaluvına azırlamağanlarğa qarşı protokollar ne vaqıt tizilecegini körmege ister ediler. Amma bunı körmeycekmiz dep tüşünem. Epimiz içün ders olmalı, özüñden başqa, kimsege inanmaycaqsıñ», – dep qayd etti faal.
Al-azırda Qırımda 26 yañı koronavirus hastası qayd etildi. 20-si ketirildi, altısı üç qorantadan yerli ola. Yedi insan tüzelip, yuqunç hastahanesinden çıqarıldı. Aqyarda beş koronavirus hastası aqqında haber etildi, dördü tüzelip yahşı oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
